Ua Siab Loj
Tus suab soob nrog lub siab dawb Muam ntxim tawb koj puas nyob zoo
Tau ntev loo tsis tau sib ntsib Lub siab txhib xav tuaj mus cuag
Muam kheev luag koj puas nco lawm Lub sij hawm ntawm lub xyoo tshiab
Kuv lub siab twb nyiag nyiam koj Nco tsis ploj koj lub suab hais
I yuav pais mam sib ntsib dua Ua chaw tshua txog hnub niam no
Ua chaw nco nyob rawv nruab siab Muam ncauj liab koj puas muaj tug?
Txawm nyob nrug ib leeg sab teb Txhob siab deb mog muam ntxim hlub
Txhob siab kub yog koj tsis dag Yuav tuaj ntag kom kev hlub muaj
Koj hau tshuaj thov cia rau kuv Yuav tuaj thuv tsim kev hlub tiag
Thov tig ntiag los npuab kuv hais Tig los txais kuv txoj kev hlub
Thiab los rub kuv rau xub ntiag Cia kuv hnia ua lub chaw nco
Txij hmo no koj yog kuv li Txawm luag ntxhi los koj txhob txais
Txawm luag hais los koj txhob teb Kuv nyob deb lub siab thiaj kaj
Nco koj tshaj hais qhia tsis tau Yog hais ntau xav tuaj mus cuag
Xav tuaj puag koj rau xub ntiag Xav tuag kiag saib koj puas hlub
Yam nkauj hnub thiab txiv nraug hli Nyob luag ntxhi ci thoob nriaj teb
Kuv nyob deb xav ntsoov koj Mov tsis noj dej tsis nco haus
Nyob tsis taus vim txoj kev hlub Seev tas hnub li tus neeg vwm
Nyob tsis tswm nco koj tsis ploj Yam tus nroj tsis muaj dej ywg
Mus txog twg los siab tsis zoo Pom nplooj ntoo nyob luag txhwb ntxhi
Siab quaj dhi xav tuaj mus cuag Tuaj mus puag koj rau xub ntiag
Nhia koj kiag tias me honey Tag kuv sim tsuas yog koj tug
Txawm nyob nrug, ua lub siab loj Yam tsob nroj thov pab ywg dej
Yog tsoj nplej kuv mam ua hnab Mov nplej qab los twb yog vim muaj koj xwb mog.